Eschamjadís d’un dimenc

La setmana passada, dau temp de la conferença dau Herve Kempf (►òc), ‘guetem dreit a la traucaplais mentala d’un complotiste. ‘Queu dimenc, mai l’ADC45 (►fr) jugavavem los topins per las flors dau desvalopament durable dins la vila de Òxxxx. Entau contat, n’i gaire de liam, segur, mas fau iò far dins lu sens cronologique.

Per ‘na bra’a mandinada dau mes d’abriu-quita-pas-ton-pitit-vestit vei-los-quí los 4 de la secta daus descreissents après bicicletejar per portar la bona parola à la gent d’endefòra lu centre vila ; Emai Òxxxx siguesse dins l’Agglò, serián qua’iment daus sauvatges sens las graulas per portar las novelas. Vei-los-quí d’abora per montar un estand clafit de libres. Sem en faça dau jardin pertajat, dins la diagonala de la biò-coop e de caire de l’AMAP. Dins l’autra alèia n’i a lu musicaire, afè, lu DJ per los sords perquè se n’i aviá pas de bruch la gent pourián se parlar, los proprietaris de la rucha que sei un pairin, ‘laidonc un espleitor d’abelha, per far breu, una saloperia de capitaliste°. I aviá maitot doas associacions per esplicar aus jòunes coma tenir lu martau avant de tustar sus sos dets.
Per alhor, la meraria lançava son desplejant sus lu desvalopament durable e organisava un voide-granier. N’i a p’un liam, aquí mas la gent erián de surtida de davant la televicon entau.

De 08 o 30 jurta 09 o 00, montatge, puèi la tipessa de la comunicacion ven per saber que que n’autres sem ?.

Me, copiat sus l’anhelat : Bèèèèèèèèèèèèèèèèèèèèèèèèèèèèèèèèèèè !
Lu chap de l’assò : N’autres sem la drescreissança joiosa !
La tipessa : E de que que v’autres pensatz de nos jornadas daus desvalopament durable ?
Lu chap, Elisabeth, Fred, me : ‘Quò es de las jornadas dau desvalopament durable ? ? ? ?
La tipessa, los uelhs copiats sus ‘quilhs daus peissons dins los dessenhs animats : ? ? ? ?
Lu chap : E bè, lu desvalopament durable es de la marda ! Aquò es usat per los politiques per res far de mai que pinturar ne’n verd de la marda de produch de marda que metan de la marda dins la testa de la gent².
La tipessa, sus la modalitat roda libra de sa cervela : Mas la politica dau pitit geste es la desbuta per far prener consciença a la gent que fau chamjar n’autres biais de far (e que entau, dins lu país daus lutins verds, las marmòtas son aürosas de pausar los bocins de chocolat dins de l’alú reciclat ; lu fagueten veire l’autre jorn dins la televicon).
[…]
Lu DJ : Atz 1 o 2 eslogans aisats per resumar la vòstra filosofia ?
Me : Mens mas mielhs ! Mens de besonha, mai de liam !
Lu DJ dins lu micro : Auèi i a mesma l’associacion per la descreissença, de la gent que son per consomar autrament, podetz venir damandar daus rensinhaments. Ilhs parlan mesma de permacultura, es de dire la cultura per las personas¹.
Lu chap, Elisabeth, Fred, me : Espofidats-da de rire. LOL coma disen los francilhons.

Bon la gent venian per lu voide-granier, pas per n’autres o l’AMAP, lu vargier. Pauc de gent per bargassar, fòra un comuniste que m’espliquet que se eriá de consent coma n’autres fòra lu mòt.

Lu comuniste : ‘Queu mòt, pòde pas iò sentir. Fai brí-brí dins mas aurelhas.
Me : Visatz, podetz dire simplicitat volontaria ?
Lu comuniste : Ma fè, vau dire entau…
Me : E bè, marchatz !

Puèi, s’entornava dau voide-granier, un complotiste. Fòrçament, lu tipe venguet me parlar a me, sem 4 darrier ‘na taula, mas eu es per esmangonhator. Debutet per los libres dau Kempf.

Lu complotiste : Perquè escrire oligarchia e non pas los grands dau monde ?
Me : Mas es un pauc lu sens d’un poder oligarchique.
Se : Beleu, e eu parla dau codex alimentarius ?
Me : Non, d’autant mai que lu codex es ‘na conaria.
Se : E los chem-trails ?
Me : Es pas l’object dau libre. Es ‘na cridada per se comportar ne’n persona responsabla… democracia… poder per tots…
Se : Mesma Chavèz parla d’HAARP.
Me : Lu filmonet³ es un fau montat per los russes.
Se : E Bilderberg ?
Me : La lista es coneguda, ‘laidonc, es pas tant secret que ‘quò
Se : Kempf denonça los franc-maçons ?
Me, sus la modalitat roda libra de la miá cervela : N’i a pas de complòt mondiau mai de la gent enchapeupunchuisats après manhiar la marcha dau monde dins d’amassadas secretas. I a per contre, converjanças daus interets dintra los que fan pertits de l’oligarchia, es de dire las sfèras daus poders de la finança, politica, mediatica.
Se : Atz de provas de quò que v’autres ‘vançatz ?
Me : Los libres dau Chomsky conten coma es farjat lu vejaire dins la premsa. 1 article per un curat assasinat sus ordre daus USA, 1000 sus un prestre assasinat per lu regima comuniste dins la Polonha.
Se : Chomsky ? Enquera un jusieu !
Me, los uelhs copiats sus ‘quilhs daus peissons dins los dessenhs animats : ?  Crese que non, afè ne’n sabe res, me’n fote un pauc e justament, Chomsky es detestat ne’n França per Finkielkraut (subretot me pense perquè los libres dau Chomsky son de las referenças mondialas, ‘quilhs de l’autre, mas dins quauques salons de París).
Se : E coneissetz lu protocole daus savis de Sion.
Me, los uelhs copiats sus ‘quilhs daus peissons dins los dessenhs animats : Es un fau. Tot lu monde iò sap auèi !
Se : Que vos disen los jornaus tenguts per los j…

Aquí copet cort. Diguet que n’autres eiperiam un tipe mai de las mans crochudas per dominar la vila de Òxxx e beleu la far s’endavalar dins la Leire°°. Lu tipe iò prenguet mau. M’etot, sei be un pau bestia de pas iò ‘ver fach pus tòst.
Afè per ‘restar ‘queu bilhet sus ‘na nòta positiva, avant l’aperitiu, veiquí ‘na tipessa, sosrire charnassier avant la man.

La tipessa (iò bòte ne’n frances autrament es pas risolier) : Bonjour, je suis l’élue¹.
Lu chap : ?
Me : je suis Trinity, voici Morphéus. Nous attendons la voyante qui est en train de cuire des cookies¹¹.
La tipessa, los uelhs copiats sus ‘quilhs daus peissons dins los dessenhs animats : ? Je vais vous cherchez l’agenda 21 où je suis avec DD (l’eiriçon dau desvalopament durable).

Es aquí que compreguetem que la meraria eriá de dreita-dreita.
Eisemple : parletem un pauc coma ela de las pistas per las bicicletas. V’autres iò sabetz pas mas : los ciclistes mai las ciclistas son dangierós, es perquè meteten de las malaisidarias tot dau long, entau, la pista demora nuòva, los ciclistes son sus la rota au mitan de las veituras.
Autre punt, los trepadors traucors per los eifants, las personas andicapadas, los vielhs… es un chause antibanhòle de tròp.

« Som una solució, no un problema » de legir aquí(►cat).

D’aicí a creire que los jusieus siàian dins ‘quel afar ? Sabetz que me’n pause de las questions quauquas vetz. E tant lu dire que dins l’eimatge, botatz « musulman » ne’n luòc de « juif » per comprener la pensada daus regents actuaus dins lu govern de París.

Nòtas :

° après mieijorn un amic bicicletejor, mas vegetalian e antispeciste, venguet nos veire 🙂
¹ es pas ‘na conaria, son los perpaus vertadiers.
² son pas sos perpaus vertadiers, mas lu sens es servat.
³ segre ‘queu liam (►fr) per saber de que que parle.
°° Sus un sit complotiste legissi que d’adicionar lu 11 de setembe de 2001 mai lu 11 de març de 2011 nos fasiá montar d’un eschalon dins la vertat dau calendier Mayà. I a TFn1 per lu temp daus cerveus pres a clafir de marda e la tiala per iò daissar pausat.
¹¹ questa vetz es ‘na conaria, mas eriá nòstra pensada.

Publicités