Per dire la vertat, voliá me la jugar : « dau temps de la névia »,« coma i aviá 20 cm »,« sei estat barrar chas me 15 jorns » e far un pauc lu fièr.
Per solidaritat coma la neu, e maitot dins ‘na fòrma de pensada surcilièra, una analogia mimetica dirián los francés, passí 3 jorns a legir daus libres que venen dau fred, non pas dau refrigerator, mas daus país freds coma la Suèda (►su)o lu Danemarc (►da).
Maj Sjöwall e Per Wahlöö « le policier qui rit (►fr) » : dins un autobus, una nueit de pluèia, un tipe massacra uech personas. Martin Beck, lu superintendant de la poliça de Stockholm (►su) menerá ‘n’enquesta ben elunhada daus imatges propets que podem aver sus la Suèda. Trobí los 3 prumiers chapitres mauaisats de legir, mas après, siguí jaspit a ma legida coma la gaulha aus botilhons.
L’autre libre « freg », afè, los dos autres perquè ne’n mangí dos, son dau Jørn Riel « la passion secrète de Fjordur (►fr) » e « un curé d’enfer (►fr) ». Son de las pitas novelas que los eròis sautan l’una-l’autra, un ‘nivers de névia, de bestia, d’òme maitot, tant e mai que a la debuta los pensava gais, mas non, son daus masles dins ‘na stacion dau Grønlands(►ka-da-en). Non pas vos dire de las legir per rire un còp, vau taschar de ne’n revirar un bocin d’una, entau v’autres vos farjaretz un eivís pròpri.
E puèi me rendí compte de ma conaria tan de voler per la legida gardar la neu, tan de bargassar coma se n’autres eriam los mai a planher. Adonc, un bilhet per vos conselhar la legida de « la décroissance (►fr) » limerò 75. Fau segur legir l’analisa dau partit « Euròpa-Ecologia-los Verds », n’i a un avenir dins lu plaçon per los vielhs fonccionaris 🙂 , fau legir las paginas sus la mira dau monde sens limita de l’informatica, mas subretot lu bilhet sus lu « buen vivir (►fr) », la descreissença golarda (►es), lu benaise coma ‘quò poriá se dire ne’n lemosin.
Tot blocat qu’eriá dins lu nòrd, ai ren legit d’Alberto Acosta o d’Esperanza Martinez, vau solament revirar daus bocins dau bilhet.
Pablo Davalos : [tota] creissença economica vida de lur contengut, las istòrias e las culturas daus pòbles desparriers e los emplissen de tot ‘quò qu’es jutjat coma valide segond la logica de la rentabilitat […]
David Choquehuanca : […] Per los pòbles indigènes, n’i a pas mai la concepcion de la pauvretat coma un manca de gatge materiau o de la richessa liada a un pro […]. Los bens materiaus son pas los sous criterís, i a d’autras valors : la reconaissença sociala, culturala e mesma spirituala dins la relacion dintra la societat mai la natura, las valors umanas […]
Rapieta 