La Descreissença ne’n 10 questions.

descreissenca.jpg‘N’autre nom ‘riá pogut estre « la descreissença per los banturles° » o b’etot « la descreissença esplicada a mos goiats », los autors prefereten far responsa a 10 questions que manca pas de far sautar ‘queu mot de « descreissença ».

Lu libre voliá quilhar ‘na basa per bastir lu desbat e non-pas lu restar nete. ‘Quò esplica perquè i a mants desvelopaments sus ‘na mesma eidèia, emai aquela eidèia siàia totjorn ne’n gestacion. Lu libre laissa laidonc la chaça aus mescheantas fadas per aprofeitar daus desvelopaments actuaus daus pensors. Lu libre torna ‘pelar entau lu contèxte istoric, lu chaminament d’eidèias politicas coma « desvelopament durable » o la « creissença verda » maitot ; ne’n balha per ‘quí qua’iment ‘na definicion mai-que possible.

‘N’autra qualitat dau libre es de balhar las citacions dins lur entiaretat¹, e, coma ‘las son esplicitadas dins un contexte clar, los perpaus son pas deformats coma ‘quò-es mai-que-mai ‘n usatge de la premsa dominanta, per eisemple, los perpaus dau Ive Cochet sus lu tresema eifant.

‘Tencion, lu libre es pas lu manuau dau perfeit descreissant, mas, après l’aver legit, quante ‘na persona dins un desbat tentará de vos eijectar d’un « v’autres setz per nos far tornar a l’atge de peira », sauretz l’importança de pas s’esjacinar, s’esmalir, s’esmaiar, s’emmaliciar, s’esmangonhar² e sauretz surtir de ‘quela oposicion sterila  mai subretot ente trobar ‘na responsa possible.

PS : dins lu corrier daus lectors dau jornau « la descreissença » n°72, ‘na lectritz s’esmaronha que los autors sian dins ‘na meijon d’edicion d’una multinacionala. Ne vau pas vos dire de iò raubar, mas beleu far passar ‘na comanda a vòstra bibliotèca per l’empruntar.

Nòtas :

° per ‘quilhs que laschan dau « bòbò » de pertot, maitot.

¹ e non pas las escopilhar coma aquela dau Micheu Rocard : La França pòt pas dire  « ‘chaba d’intrar » a tota la misèra dau Monde, MAS ‘LA DEU NE’N PRENER LU SEU BOÇIN.

² n’i a enquera mai dins la biaça 🙂

-★-

Francophones, pour lire ce billet dans votre idiome, cliquez ici. Ce mercredi soir, (22/09/2010) à 18h20 environ, la décroissance est sur F®ance-©ulture : http://www.franceculture.com/emission-du-grain-a-moudre-ivan-illich-est-il-un-precurseur-de-la-decroissance-2010-09-22.html

-★-

Publicités