Lu blu es `na color chauda

Veiquí un pitit bilhet coma `na fòrma d’introduccion a un autre per `ribar sus « los gais e la bede ». Per dire verai `quò es mai-que-mai per bargassar un pauc sus aquela goiata, Julia Maroh, qu’i a `n’annada la coneissiá quitament pas.

blu.jpg

A la debuta, un lector d’aqueu ciberquasernet me mandet un liam.

Lu servet un an de temps, lu liam pas lu lector, afè ne’n sabe ren,  juscà veire `ribar lu 17 de Mai e damandar l’autorisacion per far `na revirada. Reçauguí p’unas responsas, `laidonc iò revirí. Mas veiquí, de butinar son jcibercaier descubrí (1) que la tipessa veniá de `chabar un libre :

« Le bleu est une couleur chaude ».

Vei-me-quí `donc après lu `nar querre mai de lu pas trobar còp-sec. Damande au vendor que sap ente se troba chascuns daus libres de son reijon, me iò balha e me, me sente oblijat de lu `chaptar. Dau temps d’espera a la caissa, l’ubre rapidament per me dire entre me-mesma, marrit :

`Quò me fará un libre sus las jòunas lesbienas, ne’n manca dins ma bibliotèca.

Màs veiquí, v’autres iò sabetz que faudriá jamai se fiar a las prumièras pensadas, J.A.M.A.I. que fau totjorn se far fissar per lu `gulhon de la curiositat. E aquò es bon maitot per me.

Paubres, Lu torní dubrir `queu libre, per pas lu tornar pausar avant doas oras plenas. Paubras, `quela istòria de goiatas, segur, de goiatas lesbianas maitot mas subretot una brava istòria d’amor en gris naussat de blu.

I a de’n prumier l’istòria qu’es contada per l’Emmà tras la legida d’un jornalet intima e  desempuèi la meijon dau pair mai la mair de Clementina.

Après, i a `queu tesmonhatge de las chausas que se passan dins la testa de la dròlla quante `riban sos 15 ans, un pauc la mesma chausa que dins totas las testas, màs es contat emb daus mòts aisats, e las ilustracions `pulhan los perpaus.

Ne’n mai d’aquò i a l’evolucion de la goiata dins sos pensaments mas dins sa gaitituda maitot, `laidonc l’omofòbia daus amics, esser metuda defòra per sos pairs…

E per `chabar, las doas goiatas que tiran de bana ; aquí podetz virar de biais `na goiata per un goiat, podetz botar dos òmes o b’etot sabe pas-que, breu balhar de la liberta a la vòstra imaginacion, màs l’istòria d’amor bancurá pas.

M’es `vís que la Julia Maroh s’espelidet dins `queu prumier chap-d’òbra (2).

Nòtas :
1/ descubrí maitot de legir los comentaris que `la aviá un vertadier « fan-club » de « lol-fun-hihihihihi », afè, vole pas passar per un vielh colhon, i a 20 ans eriá benleu parrier.
2/ dins un futur bilhet vos esplicarai perquè eu se troba aura conhat a costat daus libres de Fabrice Neaud.

Publicités

3 réflexions sur “Lu blu es `na color chauda

  1. Patricia 06/06/2010 / 22:52

    🙂

    J'aime

  2. Jp la rapieta 06/06/2010 / 21:58

    Coma l’autritz me sembla nascuda bonastruja, son libre es benleu parrier.
    Torne iò dire, m’aguesse fiat au `nivers de son blòg, n’auriá pas `chaptat `queu chap d’òbra. Aime quante las chausas tornan me quilhar a ma placòta entau.

    J'aime

  3. Patricia 06/06/2010 / 21:43

    Pel còp, me pense que i a vertadièirament una fadarèla dins l’endrech : aqueste après-miègjorn, tombère sus aquel libre sul siti de la fnac, qu’ère a cercar una biò de Romain Gary.

    J'aime

Les commentaires sont fermés.