Setmanas 14 & 15

Quò i es, i sem, los jorns clars son ‘quí.
Au merchat, ‘quò es lu temps de las darnièras raiças d’eliantis, un cosin de las topinanbors, mai aisat de trabalhar, un pauc mens amar, lu temsp de las darnièras raiças blanchas, las doas serán usadas gratinadas o dins ‘na fuelhada que veiquí la recepta :

  • 100 g de farina de blat
  • 100 g de farina de chastanha
  • 1 pinçada de sau
  • 1 uòu
  • 1 culher de levadura dau bolengier aigada dins la meitat d’un veirre d’aiga teda.
  1. Dins una topina, fau tot boirar e laissar paussar ‘na demiá-jornada.
  2. Lendeman, fau far cueire los legumes de la garnitura, de las raiças blanchas o iranjas, de las pomaterras.
  3. Estalar a la man la pasta sus ‘na fuelha de cueisson sens obludar de far ‘na pita tauvera. Espandre los legumes.
  4. Dins un topinot, cassar l’uòu e lu boirar coma una culhèra de farina e doas de lach.
  5. Far tombar ‘queu aparelh sus los legumes, enfornar per 30 mn, t7.

Aquò es maitot la plena e corta sason daus crochets, daus espinards jòunes e dau granons ; los tres se minjan ne’n salada.

Crochets e pomas sechadas :

Fau nestiar, lavar 2 pès de pissanlieit, los coijar sus una sauça mostarda.
Per dessus, fau pausar de la pomafrucha sechada e fialatada d’òli perfumada aus champanhous.

Granons :

Ilhs son passats 10-15 minutas dins lu cuech-vapor, 10 a 20 branchetas.
Los pausar dins ‘na ‘sieta, surtir quauques bocins d’una ‘lissa que bonha dins dau miau. Fialetar d’òli d’oliva.

Espinards jòunes :

Fau los nestiar, los lavar e los bocinar.
Fau pelar una eschalòta, la descopar maitot
Boirar lu tot dins una topina, arosar de vinagre de citre.
Ajutar quauquas granas sechadas o una pera coma la « passe-crassane ».

Bon, dins la revirada françèsa, i a un passatge sus los legumes obludats, vau pas i tornar, i a maitot la recepta de la cornuda, mas tant per far la briocha sucrada balhí la mesma recepta, ‘n’amija me parlet dau « préfou », una fòrma d’anti-pasti Venden. Fau solament metre la meitat dau sucre e lu cueire en long, come un pan.
Per garnir, fau esbocinar de l’alh e dau burre, iò tartinar avant de botar un pauc de formatge blanc (per esemple). Far cueire 5 minutas.

Aquò es la sason de la confiture, ujan ai realisat ma prumièra, aquela de pissanlieit.

~~~

Obludatz pas de gaitar lu film de Coline Serreau, benleu dins vòstra vila, obludatz pas Bernard nimai.

~~~

Quò i es, los jorns clars son ‘quí, la natura chanta. Dise pas ‘quò es parrier que La Pastorala, mas i a un quauquaren dins lu Turlututu, subretot ‘quela interpretacion, torne grandmercejar aquí lu Maime.

Publicités