Quatre, ne’n tene quatre d’una vetz !

Non, p’una esperiença cosinièra me fitet venir esberit coma lu pitit talhor dau conte, mas coma la fin de la mesada es reservada a ‘na setmana sens escran, me fau conhar dos bilhets dins un sol. I a mesma una tresena accion, coma la pasta  per las dents, perquè vos convide a esmerar vos placards° per la prima que ‘riba.

‘Na pita esplicacion : ‘queu « minjar çò d’aquí » m’oblige a ubrir los placards per ‘nalisar lu dedins, lu minjar segur perquè « jetem pas lu minjar », e mai d’una vetz, i tornar botar de las produccions quante ‘quò ‘las son pas localas, ‘las son per lu mens mai pròpchas.

La farina de blat negre per eisemple, « biò » ‘la veniá de China, « pas-biò », de Bretanha. Dins la mesura que favorisava desjà lu locau, preniá la bretona, la damanda creissanta dins lu biò fa qu’auèi, trobem de la biò & alsacièna. Un jorn, ‘restarai d’estre un achetor passiu e me songe que trobarai de la farina de blat negre biò & locala dau costat de la còpe…

Aquela farina de blat negre, ‘la es utila per lu monde alergique au glutena. Aviá jà balhat la recepta daus galetons°°, veiquí ‘laidonc lurs cosins de la Corresa, los tortons°°

  • 450 g de farina de blat negre
  • 50 g de farina de froment (la blancha pòt esser usada sans problèma)
  • 1 veire d’aiga teda ente i a un culher de levadura dau pestor °°° (subretot pas de la chimica)
  • 1 culhèra a sopa d’òli d’òliva
  • ‘na pincada de sau
  • un pauc mens de 400 ml de lach

Boiratz las doas farinas dins ‘na granda topina (emb los bòrds nauts), versatz l’òli, la sau, la levura bonhada, puei 300ml de lach. Fau pastonar un bra’e momint puei laissar la pasta se pausar per levar (de 2 oras d’aicí a la jornada).

Una vetz la pasta levada, boiratz un còp de mai, seguiant l’espessor, ajutatz dau lach (o un veire  d’aiga, pas mai).

Dins ‘na padela o una crespiera chauda, fau botar un pau d’òli, de la pasta, far cueire benleu 40 secondas un costat, 40 l’autre.

‘Quela farina est usada per far dau pan maitot.

  • 400 g de farina de blat negre
  • 400 g d’aiga
  • 1 culher de levadura dau bolengier (aigada dins de l’aiga tèbia)
  • ‘na granda pincada de sau

Boiratz tot dins ‘na topina. Dins un mòtle burrat, versatz la pasta e laissatz pausar 1 ora per lu mens. Botatz lo mòtle dins lu cuechvapor, lu ‘lumar per ‘n’ora.

‘Tencion : chausissetz lu mòtle segon vòstre cuechvapor, per ma pera, quò es un gatge plastic recuperat. Dau temps de la cueisson, mesfiatz v’autres dau niveu d’aiga dins lu cuechvapor.

Coma lo pan entau fach es de las vetz un pauc umide, podetz lu botar 5 mn dins lu forn per iò sechar. ‘Queu pan es espés, la mija qua’iment sens trauc.

De vidar los placards, ‘chabí los sachons de pastas, aqueus de riz, tot aquò será chamjat per de l’avena o de l’òrdi.

Òrdi perlat au lach

  • 250 g d’òrdi
  • 1 l de lach
  • 100 g de sucre (ros, aquò es melhor)

Fasetz trempar l’òrdi dins ‘na casseiròla tota ‘na nuech. Lendeman, laissatz bulhir aquela casseiròla d’òrdi sens chamjar l’aiga, 5 minutas de temps. Esgotatz l’òrdi.

Fajatz chaufar lu litre de lach e quante eu bulhit, gietatz i dedins l’òrdi. Cubrissetz e laissatz cueir 40 minutas (benleu mai, seguiant que v’autres aimatz l’òrdi ferma o non).

Tuatz lu fuòc, ajutatz lu sucre, boiratz e laissatz fredir.

Desboitoní maitot daus placards lu cafe de’n prumier per pòder contunhar de tirar dins la tireta a tè d’aici a pòder culhir de las plantas per infusar lu mandin. Lu cafe es estat viste rebondut au perfiech de l’òrdi grilhat, òrdi mondat ‘questa vetz. ‘Quò es aisat de far mas un pauc long maitot. Fau far trempar l’òrdi tota una nuech per lendeman la far sechar dins ‘na padela d’aicí a aver los gruns brun qua’iment negre. Los far fredir avant de iò molinar.

Veiquí tres receptas de « cafe d’òrdi » :

  • 1/2 d’òdi grilhat molinat
  • 1/2 de chicoréia molinada

Dins ‘na cafetièra a piston, botatz un pitit culher d’aqueu boiradís per tassa, l’aiga corespondanta. Boiratz, laissatz infusar 2 mn avant de baissar lu piston. Podetz servir, zò sucrar si v’autres aimatz entau.

  • 2/3 d’òrdi grilhat molinat
  • 1/3 d’anís molinat

Dins ‘na cafetièra a piston, botatz un culheron solament de chicoréia en grun, un culheron d’aqueu boiradís per tassa, l’aiga corespondanta. Boiratz, laissatz infusar 2 mn avant de baissar lu piston. Podetz servir, ò sucrar si v’autres aimatz entau.

  • 4/5 d’òrdi grilhat molinat
  • 1/5 de cardamoma molinada

Dins ‘na cafetièra a piston, botatz ‘na culhèra a cafe solament de chicoréia en grun, un pitit culher d’aqueu boiradís per tassa, l’aiga corespondanta. Boiratz, laissatz infusar 2 mn avant de baissar lu piston. Podetz servir, iò sucrar si v’autres aimatz entau.

Nòtas :
° descubrissí aquela idèia dins un pitit libre de Dominique LOREAU « L’art de l’essentiel », chas Flammarion. Sostitolat « Jeter l’inutile et le superflu pour faire de l’espace en soi » lu libre perpausa de chamjar nòstre punt de vuda sus los gadges esparpilhat alentourn dau nòstre espací de vita. I a un chapitre sus las resèrvas alimentarias e lu perquè n’autres en fasem. L’autritz parla d’una costuma jusieva que consista de tot desboitonar de sos placards, aquò, ‘na vetz l’annada, per daissar un pauc de plaça au minjar de l’annada entranta.
Un bocin dau libre :
Moins consommer: un acte politique
[…] Mais apprendre à vivre avec moins en biens et en revenus dépasse de loin toutes les bonnes actions dictées par les « pros de l’écologie ». Aussi simpliste que cela paraisse, l’acte de consommer moins est probablement l’engagement le plus radical qu’une personne puisse prendre à un niveau individuel pour sauver la Terre.
[…] En gagnant de l’argent et en le dépensant, nous diminuons non seulement nos forces personnelles, mais nous endommageons l’environnement et cela résulte de tout ce que nous achetons. Quand nous achetons, cela signifie que nous utilisons les ressources de la planète. Pour faire un hamburger, il faut des grains de blé, de l’eau, des fertilisants, des pesticides, de la terre, de l’huile, du bœuf, des arbres, du plastique, du gaz, de l’électricité, des usines d’emballage… nous desséchons les réserves de la planète en eau. […] faites le plus de choses par vous-mêmes.
°°  en lemosin dins la version francèsa, si-us-platz. Los descreissants saben lu ròtle de la linga dins lu benaise.
°°° pestor = bolengier.
Publicités