Setmanas 7 & 8

Los comptes renduts se seguen e… se semblan per ‘quilhs quinze jorns, per causa dau freg e de névia, de sason tot aquò, mas la gent iò obludan vista, afé.
Sem pas preste de tornar veire florir de las noveutats sus los rares estalatges daus rares merchands dau merchat. Per aquela rason, las raiças son totjorn a l’onor dins mon cabàs e sus ma taula, segur.
Los menus son semblables a ‘quilhs dau quinzes jorns passats fòra quauquas sopas per prendre la plaça dau pan perdut, dau porrat, dau chaul. Aquela facilitat dins lu compte rendu me fai passar dau calcul quilometrique a de las receptas de sopas bonas e chaudas per se chaufat lu còrs.

~~~

Marche pas balhar ‘quí la recepta de la sopa de pomaterras, chascun a la soá de conhada dins sa testa ; per ma pera, ne’n desboitoní una fòrça fòrça chauda dins laquala i a doas lechas espessas e sus laquala fau bufar un brave momint avant de poder minjar.

Sopa de claquetas (6 personas)

  • 800 g claquetas
  • 150 g inhons
  • 30 g de burre (o 40 g de margarina)

Fau far trempar las claquetas la velha, dins ‘na casseiròla. Lendeman, après ‘ver dorats los inhons dins lu burre, fau ajutar las claquetas esgotadas, cubrir d’aiga e far cueire 2 oras minimum avant de tot versar dins la sopièra.

-Podem i ajutar daus bocins de pan grilhat, dau formatge, dau pan, una culhèra de cresma frescha…
-Podem ajutar de las algas a la cueisson de las claquetas.
-Aquela recepta, l’ai realisada coma daus peseus (lu « pois-chiche » francés)  o de las lentilhas ; seguiant los temps de cueisson, ‘quò será pus o mens liquida.

Per far d’aquela sopa de claquetas, una sopa de claqueta & oselha, apres las doas oras de cueisson, i ajutar de l’oselha apchada (200 g) cuecha dins dau burre sus ‘n autre fuòc.

Sopa de mongetas (4 personas)

  • 50 g de mongetas
  • 20 g de champanhòus (1)
  • 4 tomatas (2)
  • 1 inhon
  • 30 g d’òrdi (3)
  • persil, pebre, sau, òli d’oliva.

Fau far trempar las mongetas la velha, dins ‘na casseiròla. Lendeman, las far bulhir 5 minutas avant de tuar lu fuòc e daissar fredir, cubert. Chamjar l’aiga e far las far cueire 40 minutas.
Apchar l’inhon avant de los botar dins ‘na casseiròla emb una culhèra d’òli, las tomatas apchadas ela’tot, los champinhòus blanchits. Far dorar doçament.
Ajutar las mongetas, l’òrdi, la sau (‘na pincada), lu pebre (3 torn de molin), 50 cl d’aiga (pus o mens, aquò de l’espessor que v’autres voletz balhar a la sopa). Laissar cueire suau-suau d’aici a çò que l’òrdi siàia tendra. A ‘queu momint, fau ajutar una o doas branchetas de persil apchada.

nòtas :
1/ champanhòus secs que fau tornar idratar dins de l’aiga tèbia avant de las blanchir (2 minutas dins l’aiga bulhanta) o b’etot daus champanhòus descongelats, mas ‘quò es pas parrier. Lu sechatge daus aliments será abordat dins ‘n’autra partida de l’annada.
2/ tomatas sechadas o servadas dins l’òli. La conservacion dins l’òli será abordada dins ‘n’autre bilhet.
3/ de l’òdi « perlée (en francés)». Pòdetz usar dau bolgor. Si usatz de l’òrdi « mondée (en francés), fau pas obludar de la far cueire 1 bona ora avant de l’incorporar).

Coma quauqu’un m’a damandat una recepta ralisada a partir d’una « bóitia », ne’n veiquí una, la sopa de bigarroés (4 personas) :

  • 400 g de bigarroés « en bóitia »
  • 30 g d’òrdi perlada
  • 2 eschalòtas
  • 15 cl de cresma frescha
  • pebre, sau, una notz de burre

Far fondre lu burre dins ‘na casseiròla avant d’ajutar las eschalòtas apchadas e laissar cueire 5 minutas sus un fuòc doç. Ajutar lu bigarroés, l’òrdi e cubrir d’aiga avant de iò far bulhir 2 minutas. Après aquela ebulhicion, far cueire doçament 40 minutas.
Reservar lu jus de cueisson avant de passar l’òrdi e lu bigarroés dins lu molin a legums. Dins la purea obtenguda, fau versar lo jus reservat jusca ‘ver la consistença vouguda, puei la cresma, la sau, los tres torn de molin de pebre.

-Podetz i junher un porrat o una pomaterra. Podetz metre dau bolgor a la plaça de l’òrdi, o benleu dau riz se v’autres atz pas paur de far petar lu bilanç carbona de vòstra sopa.

Publicités