Setmanas 5 & 6

Veiquí lu temps dau segond bilhet per parlar dau « minjar çò d’aquí ». Avant de balhar la lista de las pervesions de la paucha orleanèsa de mens de 40 ans, fau ‘na pita mesa au punt.

Aquela accion es d’esposar non pas la vita estraordinaría d’un vilaud mas pitit a pitit d’ilustrar las contradiccions, las facilitats, las chausidas. Es un esemple pratica non pas per lu segre per lu cuòu coma un pitit chin, mas per iò prener coma una perpausicion.

~~~

‘Queu dissabde, au merchat daus productors, i aviá enquera daus bulbes de cerfuelh (10 €00 / Kg), de las pomaterras (1 €20 / Kg), de las caròtas rusticas (1 €30 / Kg ; de notar : lu barqueton de carotas iranjas rapadas es vendut 1 €62 / Kg chas lu super-discontor, sans dire d’ente ‘las venen), de las raiças blanchas (4 €00 / Kg), dau chaul roge (1 €00 la testa), de la raiça negra (1 €00 lu bocin) e ‘na bòta de porrat (1 €50 la bòta sens tròp de verdura). Per las fruchas de la quinzaina entranta, me sei contentat de pomas Belchard (1 €50 / Kg) e de l’òfra granda « fau voidar nos refrigerators » 2 €00 los 3 Kg. A ‘queu pretz, ‘quò es pas dau biò, segur, mas ‘la ‘chabarán esbolhat dins ‘na compota (de notar dins lu supermechat, los 4 pitit topinots de plastique e la surenvelopa de carton son balhats per 3 €80 lu Kg, 3 €47 lu kg chas lu super_discotor, mas ‘queste darnier fai una òfra de 2 Kg de pomafruch a 1 €89 se v’autres en prenetz 3 Kg, comprene pas, ‘quò es tròp concepte-de-publicitarí per me).

Per informacion, legissava dins la propaganda que lu super-discontor embrena ma bóitia a letra qu’i avia ‘na promocion sus las cerealas emb dau glucòsa a 4 €35 lu Kg, contra 3 €59 las cerealas de basa dins l’espeçaria biò.

~~~

Veiquí lu menut que la dimenjada es estada retirada

setmana 5

setmana 6

Diluns

Purea de peseus

Bunhet de raiças blanchas

Dimarç

bulbes de cerfuelh rissolats

Crespas

Dimercres

Pan perdut

Tòfu & chaul roge

Dijòus

Fuelhetat de formatge

Purea de lentilhas

Divendres

Porrat bechamèla

Pizzà caròt

pict0087.JPG

De la gent m’an damandat de las receptas realisadas emb daus legumes secs, veiquí la dau diluns, emb daus peseus (lu « pois-chiche » francés). Per 4 personas :

Fajatz trempar 200g de peseu dins un topinot dau dissabde juscau dimenc mieijorn. Vidatz l’aiga, rinçatz e tornatz botar los peseus dins lu topinaot mas sens aiga ‘questa vetz, un pauc coma per far germar las granas, cubratz.

Lu diluns mandin, tornatz rinçar un còp de mai avant de los far bulhir 5 minutas dins ‘na casseiròla, ras cuberts d’aiga. Tornatz rinçar avant de los far cueire fin finala 1 ora dins 1 litre d’aiga.

Dau temps de la cueisson, pialatz 1 ‘lissa, la desgermar avant de la apchar ; pialatz e esbocinatz 1 eschalòta. Boiratz ben las doas e ajutatz 3 torns dau molin de pebre e ½ culher de curcumin. ‘Queu boiradís será gietat dins los peseus ¼ d’ora avant la fin de la cueisson.

L’ora achabada, molinatz tot aquò e avant de far lu servicí, ajutatz 1 culhèra de vinagra de citre e 1 fialat d’òli d’oliva, ‘na pincada de sau.

Aquela recepta es tant valabla per las fevas sachas, los « azuki », lu sojà. Fau solament chamjar lu temps de cueisson.

pict0088.JPG

Avant la purea de peseu, perdequè ne pas minjar ‘na salada composada :

– 2 pomafruchs esbocinadas

– 200 g de raiças negras tranchadas

– 100 g de crochets

~ 20 g de miau ente bonha ‘na ‘lissa apchada.

Fau boirar tot aquò dins ‘na sieta.

Aprep la purea, perdequè ne pas far bolar ‘na pera dins una infusion de telhòu e de menta :

– 4 bravas peras

– dau telhòu e de la menta

Preparar l’infusion dins ‘na granda casseiròla, quente ‘quò bulhit, i gietar las peras 5 a 10 minutas. ‘Na vetz freda, la posar dins 4 bòls e tornar preparar una tisana e la versar dins los bòls. De minjar chaud, fred, tèbie…

~~~

Velorucion3 per velorution24

Publicités