Setmanas 3 & 4

Lu prumier bilhet d’aqueu engatjament se descubra quante las darnièras traças de neu se desneblan, fòra ‘na meschenta bisa dau mandin. Afé, lu merchat dau dissabde tòrna estre ben achalandat.

mca1.jpg

Lu prumier merchant visitat es lu laitier per pausar la botelha de lach vida contra una plena e un topinot de cresma (totau : 2€80 ).
Aprep marche corrèr chas « marches de la racinerie », son daus merchants dau barrí d’Orleans (totau : 5€30), daus merchants de raiças. An daus pissanlieits e daus chicons de cava, de las caròtas rusticas que serán minjadas cuechvaporisadas emb un fialat d’òli d’liva perfumada aus cèps :

Òli perfumada aus cèps
Per iò far, fau chaufar suau-suau 20 cl d’òli (~ 15 mn), tuar lu fuòc avant d’i botar 80 g de cèps sècs. Paussar 2o00 de temps avant de filtrar. ‘Quò es ‘n’òli d’acompanhament, la savor se mesla fòrça ben emb lu vinagre de citre.

Faudrá gardar 2 caròtas per preparar mai de las raicas blanchas (pastenaga) ‘na torta lemosina.

La torta
Per la pasta, vos fau :
– 500 gramas de farina (blat negre quo es melhor mas la blancha pòt o far)
– 1 veire d’aiga
– 1 cuba (40 g) de levura dau bolengier
– 1 uòu de pola
– ‘na pincada de sau

Dins ‘na granda topina, boiratz la farina, la sau, la levura, pueis l’uòu e lo veire d’aiga. Boiratz, sens tassar. Laissatz possar ‘na nuech dins un endrech chaufat.

Per la garnitura, vos fau :
– 400 g de raiças blanchas
– 100 g de raiças rojas (caròtas)
– ‘na ‘lissa, de la sau, dau pebre

Passatz los legums 20 mn au chuech-vapor.

La bola de pasta deu èsser copada : 2/3 per lu fond, 1/3 per lu chapeu. Fau estalar la pasta emb lu roleu, la posar dins lu plat e per dessus, botar la garnitura, de la sau, dau pebre, la ‘lissa e ‘chabar per lo chapeu.

Bon, ben resta d’enfornar nòstra tortiera enchapeudada per 40 mn, termostat 6 / 180°.

Chanjament de merchant per un autre (~ 6€00), e entau ‘chaptar los darniers cròsnes de la sason, ‘chaberen rissolats. E emb ‘quò ? De las bledas e un chaul-flor.

Las costas de bleda.
Vos fau :
– 1 pè de bledas
– 100 g de forma d’Ambert
– 1 uòu
– 1 veire de lach
– de la sau, dau pebre…

1. De’n prumier nestiatz las costas dins de l’aiga e separatz la verdura de la partida dura. Atz pas mestier de la verdura dins aquela partida, mas reservatz la per lendeman (veire lu liam).
2. Copilhatz las bledas per las far cueire dins un’ aiga bulhanta d’aici a las aver tendras, moflas mas pas mòlas de tròp (1/4 d’ora)
3. Dins ‘na casseirola fatz chaufar la meitat dau veire de lach, lo formatge esbocinat emb ‘na forcheta, fuòc doç. Tiratz la casseirola quante lo formatge es fondut.
4. Burratz un plat per gratinar, botatz las costas puèi lu formatge fondut.
5. Dins la casseirola, boiratz l’uòu coma lu lach, versatz sus lo formatge. Pebratz, ajutatz la sau avant de iò metre 5 minutas dins lu forn (th 5). Podetz lu far gratinar maitot, metre de la cresma frescha…

Lu chaul, se, será preparat a la saussa blancha. Far cueire lu chaul-flor dins ‘na cocota o dins lu cuechvapor.

Per la saussa
Boiratz 40 g de farina blancha e 10 cl d’aiga freda. Far bulhir un demiei litre d’aiga e au momint de l’esbulhicion, i versar la preparacion, sens obludar de boirar. Salatz, pebratz coma v’autres aimatz. Daissar reduir d’aici a aver la consistança vouguda. Avant de versar dins un plat per far gratinar, botatz dedins e boiratz 50 g de margarina.

Lu restant dau merchat es per far la pervesion de pomas, de peras, d’uòus. Los complements que son pas detalhats dins ‘queu prumier bilhet serán ‘chaptar a l’espeçaria biò.

Per ‘chabar ‘queu prumier bilhet, que la presentacion daus autres podrá qu’estre melhora, me fau vos balhar ma prumièra grilha de menus per los 15 jorns. Lu mandin, per lu momint ‘quò es enquera dau tè fòra la dimenjada que lu café es sus la taula, acompanhat de confitura (veire catégoria « cosina » d’aqueu ciberquasernet). Lo ser, mai d’una vetz, ‘quò es ‘na grossa sòpa de legumes secs, un fruch, d’autras vetz un boiradís dau mieijorn.

s34.jpg
Setmana 3 & 4 – las chausas suslinhadas de jaune son de la receptas ja balhadas dins ‘queu joèb (veire liam).

Liams :

Publicités