Los legumes obludats

Coma dissabde darnier qu’eriá la jornada sens boticar, ‘quò vai, sei pas tròp emmardent, anguí pas far mas empletas au merchat, preferí las far lu dimenc. Vergonha sus tots aquilhs balhors de leiçons que la prumièra possibilitat ‘ribada  fan trabalhar la gent lu dimenc.

I a mai d’uns merchats sus Orleans e dins l’Agglò, mas vau quai’ement totjors a aqueu dau dissabde mandin : los bòrds de la Leire, mon cabàs, la permenada a pès e coma me prepare a ‘na vita de pitit vielh, mas pitas abitudas, mos merchands… emai ‘queu merchat siàia fòrça borgés, i a mai d’uns militants « d’estrema-gaucha » (1), forcament los « òa-òachs » (2) e de la gent coma me per representar la tendença « bòbò » (3). L’autre grand merchat es aqueu dau dimenc, dins un barri populari, un vertadier escanator, ai totjorn paur de pas ne’n surtir, e de la gent, paubres, pòde mesma pas vos dire. ‘Laidonc i a pauc de militant-a-s (4).

Ebé, deve ben iò dire, los merchants son los mesma, mas ‘quò m’oblige a los charchar, ‘laidonc ‘na vetz trobat, me fau tenir daus perpaus d’un naut niveu filosofica :

-Setz vengut aquí auèi ?
-Òc-es, ier qu’eriá la jornada…
-Avetz d’aquelas eidèias, gostatz aquelas pomas !

-Vesetz, ‘las trobaretz pas dins los chamins, segur.
-Mas…
-1 Kg e en mai d’aquò ?

‘Quò es entau fasent que « trobí » ‘na merchanda de legumes obludats. Iò sabe, coma iò disset lu Cohn-Bendit ‘na vetz, au Onfray crese :

« M’es ‘vís que los legumes obludats, se los aviam obludats ‘quò es pas sens rasons ».

Pense coma lu Danny per lu panet (5), fòra lu cosinar « a la daufinoèsa », an meschent gòst ; aime pas de tròp lu gost miei-caròta miei-nabís. Mas ‘quela merchanda aviá de las raiças de cerfuelh, de las caròtas mauvas, violetas, blanchas, iranjas maitot. Dins ‘queu cas me songe estre coma ‘na jaça qu’a trobada un coteu. Bibí un momint davant son estalatge. Ne’n profití per damandar se i aviá jà daus crausnes (6).

-Non, solament dintre lo 15 de decembre e lo 15 de genier, pas mai
-Òc mas los aime me ‘quilhs legumes
-Benleu mas las sasons son las sasons e podem ren i chamjar…

merchat.jpg

Sus aquela fotò, i a de las caròtas, dos panets~raiças blanchas, daus bulbes de cerfuelh e ‘na poma « belchard » (7).

La poma se minja crua, subretot pas cuecha, e ‘la es sucrada, ‘na charn tendra, ren a veire coma la « golden », afé.

Los bulbes se minjan : rissolats, escrasats ne’n purea, cuechvaporisats coma un fialat d’òli, ilhs maitot « a la daufinoèsa »…
Las caròtas se minjan : cruas talament son sucradas, cuechvaporisadas, a la cresma… i torne dissabde entrant per tentar la confitura de caròta.

Vau ‘chabat ‘quí ‘queu bilhet borolhonar dau temps de la Kathleen Evin, ai ‘chaptat lu libre dau Eribon e vos convide a l’escotar parlar.

Nòtas :

1/ Vau pas balhar de noms aquí, solament las initialas daus partits e de las organisacions : AL, FA, SUD, NPA, PS… non pas lu PS ai parlat de gaucha (NDR :’quela nòta es ‘na venjança personala).
2/ Sabe pas coma iò escrire, los « òa-òachs » o b’etot los « didgeridoo-men & women », filhs e filhs de … mai d’una vetz prompte-a-s a romar contra ‘quela saloperia de pitits borgés dau centre-vila mesma pas concernat per la problematica de pas aver ‘na sala de repeticion per res (NDR :’quela nòta es ‘na venjança personala).
3/ ai ‘chabat per l’acceptar aquela apelacion, subretot quante ‘la ven d’un tipe de l’Alternativa Liberticida que 22o00 entrant marcha au cinemà « bòbò » per ‘geitar un film « bòbò » (NDR :’quela nòta es ‘na venjança personala).
4/ mon vejaire es umoristica. Militant-a-s verd-a-s, NPA en fòrça, PCF.
5/ panet (Québec), pastenada, raiç-blancha, panais en francés.
6/ crosne en francés.
7/ benleu « Beuchard » ne’n lemosin.

‘Queu bilhet es un pauc maupetaçat mas es l’avant-dire d’un projecte de cronicas regulièras en occitan, en francés chas los descreissents, dins l’annada 2010, ‘na fòrma de «eat local challenge», ‘laidonc « minja çò d’aquí ». ‘Quò consista a analisar d’ente venon las chausas, l’assumar, balhar de las eideias per las acordar… i tornarai dins quauques temps.

Publicités