Lemòtges ★ Istanbula Espress

Dissabde avant lu film, i a ‘gut ‘na grande pagina de propaganda, per de las saloperias sucradas, per daus jaspitaurelhas, per de las bancas e coma ‘quò es bentòst lu Nadau, per un parfum. Deve ben iò dire que me’n fote un pauc daus imagtes que montran un monde de raibe que quante la seança es ‘chabada vos fau tornar trobar lu beton o b’etot lu bitum de la rua, los borriers que passan, un margaud crebat, de las sentors de purit perque la surtida de la sala de cinemà es dins ‘na reira cort situada dins un reir-lutz o beleu aigada e v’autres setz de bolar aquí dedins.

lemotges.jpg

Aürosadament lu filmonet montra de’n prumier ‘na vuda de la gara de Lemòtges-centre-de-mon-pitit-monde, autrament auriá pas faugut imatginar que ne’n parlesse d’aquela istòria perfumada au misteri viatjor. Dès la segonda segonda i sem pus, quo es l’estacion de Nissa, ‘na brava vila maitot 🙂

Segur, lu ‘nivers filmat es ‘queu dau temps ente aviam lu temps dau temps e non pas lu temps de las garas TGV per rentrar gaitar la televicon ; lu temps maitot ente sols la gent qu’avián de la moneda podián viatjar, l’oblude pas.

Veiquí la Audrei Tautou qu’encontra un tipe, Travis Davenport, dins lu Lemòtges-Istanbula, se floretan imatges aprep imatges, se manqueten a Istanbola per ‘chabar per se potonejar dins un espaci que tant las veiriaras que las perporcions fan sonjar a la gara daus Benedictins.

limotges.jpg

Lu paisatge filmat desempuèi lu tren es pas nimai aqueu dau Lemosin, lu Jan Peire Jeunet manquet lu « viaduc de Rocherolles » e los monts d’Ambasac emb ‘na vuda sus lu belujadís daus buescs tant minhard a la debuta de la davalada. Afé, lu subjet dau film es pas pus lu Lemosin.

La musica es :  « I’m a Fool To Want You » – Billie Holiday

Non pas far de la reclama per lu limerò 5, veiquí quauquas nòtas sus la gara.

‘La fuguet conçuda per l’architecte Gonthier ne’n 1919, desbutada ne’n 1924, inaugurada lu 02 de julhet de 1929. Bastiment en surelevacion (la gara es dessur las vetz), realisat en beton armat ‘bilhat de peires tailhadas emb un dòme chapeutat de coire, 33 m de diametre, 31 m de naut. Lu campanil s’etot es cubert de coire, eu es naut de 60 m. ‘Quilhs dos elements balhan l’estile nuòu-bisantin tant caracteristique d’aquela gara. L’espaci centrau balha a veire las alegorias dau Lemosin, de la Bretanha, de la Toraina, de la Gasconha.

La decoracion esteriora e interiora es plan richa, los vitraus son dau mestre veirier lemosin Francis Chigot. Chigot (1879-1960) es un ancian de l’Escola nacionala daus arts decoratius. Comencet de trabalhar per los monuments istoriques a la restauracion de las gleisas ‘bolhadas per la guerra de 1914-18.

chigot.jpg cha300400.jpg


hermes.jpg

 

Liams :

2 commentaires

  1. Non ‘quò es ben la Tautou, ‘n’actritz feticha dau JP Jeunet. Sus lo sit de Chanel, i a lo farjadís dau filmonet.

Les commentaires sont fermés.