17èma jornada sens boticar

Lo dissabde 28 de novembre de 2009 es la 17èma jornada sens boticar, Buy Nothing Day coma disan los anglès. ‘Questa iniciativa es dau Ted Dave, un canadian, que la societat de consomacion, e las soás resultas coma l’espleitacion de la gent o l’emprunta de la propaganda sus nòstra biais de gaitar lo monde, lu fasián s’enraujar.

‘Na jornada sens rens ‘chaptar es ‘na pita economia per lo portamoneda, segur, mas l’interès prumier es de ‘restar de far de la consomacion lu cur daus nòstres socilhs. Quauques sendareus per sonjar, per balhar la replica au :

« Òc-es, mas podem far las pervesions (1) divendres, o beleu dimenc mandin !»

De’n prumier, ‘chaptar es pas ‘na fin per ‘na fin mas solament ‘n’ajuda.

Aprep, tornar ‘pelar qu’una tela jornada es per parlar de las alternativas : vau mielhs un merchat de productors locaus e non pas un ipermarchat, vau mielhs una aisina qu’un gatge personau…

Passar mens de temps dins la consomacion per aprofechar d’un temps per viure, per mirar la natura, gaitar ‘na mòstra, ne far ren (2), jugar coma sos goiats, partejar dau temps coma sos pairs… veiquí quauques perpausicions. Per mai de concret, gardem lo dimenc coma jornada sens consomacion.

Esbolhar los espacis de consomacion, non pas per perdre dau temps de se deplacar mas per ‘nar mens luenh e subretot sens veituras. Gardar los comercis dau cuenh de la rua, bolengariá, espeçariá, mas lo cafès o los restaurants maitot, aquò per que las pitas vilas, los vilatges siàian pas daus durmitòris.

E per ‘chabar, una fòrma de « mielhs consomar ». Quauques mediàs clavan lu nòstre punt de vuda sus lu quantitatiu, lu performatiu mas parlan qua’iment jamai dau qualitatiu ! Daus noveus utilhs naissen pertant, la nocion de bonur, l’indici de santat, lo niveu d’educacion o la taussa carbona (3). S’eslunhar de la moda per sonjar avant de ‘chaptar, pensar l’acte de consomacion, aquò son ‘na fòrma de resistència enfacia de las damandas de tots los jorns que son ‘quí a far creire l’estre mens important que l’aver, ‘na fòrma de resistència per ne pus ‘chaptar per moblar las nòstras frustracions.

Aqueu tèxte volontarament pitit es estat escrit per tornar ‘pelar quauquas evidèncias, ren de mai, ‘queu tèxte volontarament cort per dire que de las solucions eisistan desjà… nos fau las realisar emb de la paciència, dau coratge, de l’umilitat, vei-lu-quí nòstre defi.

Nòtas :

  1. segur que « provesion » es pas tant charjat simbolicament.
  2. « far ren » es desparier « ren far ».
  3. la taussa carbona adjunh l’emprunta ecologica dins lu pritz finau d’un produch.

Liams :

Filmonet sus la tiala mas aura qu’avetz legir mon tèxtonet, podetz tuar l’ordinator per viure 🙂
Publicités

2 réflexions sur “17èma jornada sens boticar

  1. JP 01/11/2009 / 20:56

    Quo es per lo 28 dau mes entrant. Pòs contunhar l’entrainament 🙂

    J'aime

  2. joan.Peiroton 01/11/2009 / 07:53

    A despart deu resto, deu ciné, deu minjar per sopar e deus peatges d’autorota, èi pas crompat arren gèr dissabte…Bon, mès l’intencion i èra!

    J'aime

Les commentaires sont fermés.