Lo siròp de secant

Des la debuta ‘na pita garolha coma se ditz dins d’autras partidas de l’Occitània :

Secant per suaüc ~ suaücar ~ sieicar ~ suaücau, mots daus lemosins trobats dins lo diccionari normatiu, e, sambuc ~ saüc per los lengadocians.

Secant m’es estat balhat per ma mair, coma ma granda e mon pair, son mos occitanofònes preferats, los aime plan, adonc, l’ai escrich coma ‘quò après l’aver trobat ‘quí.

Mesfiatz-vòs i a ‘na bona sòrta de secant, aqueu qu’a de las fuelhas rondas, un pauc ovalisadas, renjadas per 5, las flors e las fruchas semblan gaitar terra, e l’autra la marrida, qué las fuelhas son en lonjor e renjadas per 7-9, qué las flors e las fruchas son tornadas vers los ceus.

Sabe que quò es important per far las gialadas e la confituras, lo vin o b’etot la liquor maitot, mas per lo siròp, sauriá pas ò dire. Ai trobat de las bonas, adonc, me pause pas totjorn de las questions.

Bon, ‘na definicion, un chafre, un pitit nom empacha pas las chausas d’esistar, quò es la plena sason dau secant. Podez far daus bunhets (passar las flors dins ‘na pasta de crespa un pauc espessa e las gietar dins d’òli chauda) o b’etot dau siròp.

Per far ~2 litres de siròp, fau :

  • 0,150 kg de flors (~ ‘na trentena de testas)
  • 1 litre d’aiga
  • 1 kg de sucre blanc
  • 0,5 kg de sucre ros
  • lo jus de 3 citrons

Tant de sucre perqué quò es un siròp, ai mesma trobat de las receptas emb 2 kg de sucre per 1 l d’aiga. Los dos tipes de sucre son ‘na fantasiá, lo sol sucre blanc pòt far, coma lo sol sucre ros, mas boirar los dos tipes chamja la color dau siròp.

Per las flors, las fau copar ras la pita flor blancha, fau qua’iment pas aver de bocins de tija verda. Après, fau far bonhar las flors dins l’aiga 24 oras. Mesfiatz l’odor, quò sent un pauc coma lo pisson dau margaud, mas bon, meschenta odor ‘bilha pas forçament meschenta cosina.
Fau colar un còp e preissar fòrt per aver beucòp de jus de color bruna virant brun clar dau temps de la cueisson. Apondre lo jus daus citrons, lo sucre e ‘lumar lo fuòc. Pas obludar de boirar per lo sucre.

Far bulhir 10 minutas avant de tuar lo fuòc, laissar fredir un pitit pauc per embotelhar. Avant de beure fau esperar un pauc de temps, las prumieras frejors de la darriera per esemple.

~~~~~ °(*!*)° ~~~~~

Ai pas jamai cachat mon interès per la simplesa volontaria, veiquí lo filmonet de campanha.

Lo sit Euròpa & descreissença es ‘quí.

Lo sit dau partit per la descreissença es ‘quí.
Publicités

2 réflexions sur “Lo siròp de secant

  1. jp 03/06/2009 / 20:03

    Torna balhar de las eidèias a la gent que troban que la polidialectologia es ‘na chausa complicada ! !
    😉

    J'aime

  2. Maime 03/06/2009 / 19:24

    Humm lo siròp de suec…

    J'aime

Les commentaires sont fermés.