Còp de fodra, lo planh dau taureu-vacha.

Bon, coma nos fau a n’autres bloguidors e bloguidritz escrir daus bilhets « portors d’eidèias » per pas far purar lo pitit Gesus, anguí (1) veire los autres joèbs per legir de las conarias daus bilhets escrichs coma quò fau. Per eisemple, e sei seriós ‘quí, ai aimat queu bilhet. Aprep l’aver legir, anguí querre lo libre a la mediateca, n’i erá pas, bon, aní (1′) lu charchar dins ‘na librariá, la sason de la bede erá pas enquera duberta. E be, i tornarai far, mas per lo moment, me veiquí de fussinar un pauc, istòria de veire quauquas noveutats e tombí sus « Coup de foudre T1-La Complainte du taureau vache ».
fodra.jpg
L’istòria es ‘quela d’un coble de farmier qu’an ‘na vacha e per aver daus pitis vedeus e de las pitas vedelas, quo es mai aisat d’aver un taureu (2). Adonc, veiquí nostre farmier tornat de la feira coma un taureu « pas char »(3), lu portet dins lo prat tot urós coma un tipe pret per véser lo film dau dissabde ser sus anal+. Mas semblarai que lo taureu es pas interessat de tròp per la vacha, non pas que se senta gai, mas pus filha que goiat. Ne’n mai d’aquò, la fodra (4) tomba e vei-los-quí, vacha e taureu de parlar de lurs problemas esistenciaus a la farmièra e au farmier d’aiciant a la fin ente lo farmier torna revendre lo taureu.

Per esser franc, m’es ‘vís que traitar d’aquela tematica dins ‘na bede grand public es ‘na bona chausa, mas, conjoncion botada ‘quí per contrabalançar la positivitat de la prumièra preposicion, mas perdequé far tant bargassar la gent dins tant de paginas quante la maitat i sufiriá ? Una vetz la situacion coneguda, pas la pena d’i tornar 36 còps per o tornar dire.

Lo taureu eispausa mai que ben la situacion dau punt de vuda de la question dau genre :

« sei una vacha dins un còrs de taureu, quo es coma aquò »

dau punt de vuda de la sexualitat

« non, podetz pas me damandar de me forçar a bicar per vòstre benaise»

e de la normalitat

« lo veterinari ven per me far quauquaren ? Ai pas tot sasit ! »

Una autra critica per mon perron de criticor-jamai-content, quò es la vacha. Ai beu aver estudiat la mecanica de la reproduccion chas los animeus, me semble gaire aver compres que la fumela erá somisa a son desir e totjorn presta per se far engrossar. Le traitament de la vacha, un pauc nècia e aürosa tant aprep aver bicar coma dins la maternitat, es sexiste.
Per ‘chabar, los farmiers : la femna es un pauc concervatritz dins sos perpaus, mas ‘la a ‘na ‘tituda pratica ; lo tipe es despassat per los eveniments, juga sus la soá masculinitat per far dau chantatge a la taurela. Quo es pas ben brave tot quò, s’en obludar que los dos se desbarassen dau fotor de merda emb son questionament sus l’eisistença.

Lu dise ‘quí, lo taureu m’a fach rire dins sas mimicas, e quo es un plaser tau que tau de veire lo subject abordat ne’n bede mas mesfia de pas esser tròp mocandier.

Los amators de bede sus lo subjet daus trans~genres/sexuaus poden legir « Soleil cou coupé » de Lax & Bertoix. Bede un pauc negra mas plan interessanta sus lo biais de viure per « quilhs gents ».

Nòtas :
1/ Pode far sens cultivar mon embonilh dins mon pitit cuenh.
1’/ Mas ai lo sens de l’umor.
2/ Sem dins ‘na bede grand public tanben, l’engrossatge artificiau n’es pas lo subject mesma se dins la vertadièra vita…
3/ Un chavau bon merchat quò es rale, mas çò qu’es rare es char, adonc, un chavau bon merchat es char (Ionescò, per la pagina granda cultura).
4/ Second punt de cultura d’aqueu bilhet. Eisista ne’n francès e benleu en occitan una diferença de genre dins « fodra ». La fodra tomba dau ceu e lo fodra es un atribut de Jupiter-Zeus dins los ciaus. Sens liam emb la question dau genre, a la prumièra legida aviá compres que qu’erá la fodra que « rendava trans » e segur que sei restar chas me dès que quò montava brun [nòta dau Desire : los perpaus transfòbes an pas besonh de propaganda, te dise pas marci Jipe]. Vau aura parlar de la transexualitat dins la mitologia, ‘n’autre biais culturau d’aqueu bilhet, t !

Dins las metamorfosas d’Ovide, i a l’istòria d’un jòune bargier, un pauc vinvòla, lo Tiresias. Queu bargier un jorn vés dos serps s’acoblar. Còp-sec, veiquí Atena ‘ribada per lu tresmudar ne’n filha. Son coma ‘quò los ancians dius. Bon ben nòstre goaiata aura, vís coma ‘na filha, as mesma un pitit. Mas, los dius s’einuian dins los ceus e un jorn, Jupiter & Junon se chamalhavan per saber qui de la femna o b’etot de l’òme preniá lo pus plaser dins l’acte sexuau ? Coma Tiresias erá estat goiat e dròlla, van la-lu far chiar emb ‘quò. E lo-la Tiresias de dire que quò es la femna, provocant la furor de Junon. Còp-sec, lo veiquí tornat òme, mas se un diu pòt pas chamjar çò qu’a fach ‘n’autre, Jupiter li crebet los uelhs per lu far devin.

~~o(*!*)o~~

Per restar dins la tonalitat e dau mesma còp tornar chas los gais, un pitit comentari sus los gatges disponibles sus lo Hitlerfòne per Google©.

Lo darrier gatge es un detector de gais. A la debuta me sei dich, ouf, aurai pus mestier de surtir ma grossa antena dins la rua per saber se un goiat es gai o pas. Me fau ‘chaptar la merda ondactiva, installar lo gatge e esperar que mon veisin paubres-pitits-queu-goiat-e-sem-bentòt-l’estiu-e-vai-se-parmenar-meitat-nut-espres-davant-chas-me-enquera-ujan faja clinhotat lo chause. Mas non, quò marcha pas coma aquò.
Los americans, ilhs son fòrts ‘quela gent, los americans an realisats de las recharchas (1) sus l’origina de la conaria de l’omosexualitat per ‘chabar per creire que benleu la genetica, benleu lo cerveu, e benleu, tendetz v’autres, benleu « las marcas digitalas e lo biais d’usar la man mança (2) » es un sinhe per reconeitre los gais. Per las lesbianas, quò es desparrier e las charchas son menadas autrament. Sens obludar que :

Me, las lesbianas, se las ‘trapava emb mon gros biron, ‘chabarian ben d’esser lesbianas. Segur !

Tornam a nòstre detector de gais, ‘pelat « straight« , per eterò. Sufís de pausar la partida superiora dau guinhaire sus l’escran dau hitlerfone per veire los messatges «Sorry, sweetie, you are» o b’etot «You are the man». Bon, aus USA, los gais an mai de poder, economicament, qu’en Euròpa e m’es ‘vís que lo boicote es aprep s’organisar. Çò qu’es un pau estranh fòra lo desvelopament d’una tela merda-mesma-pas-aquí-per-rire (3), quò es la responsa de Google©.

« ‘Queu gatge pòt ofensar d’aucuns, mas pensan pas violar la lei. Usar daus estereòtipes per tau o tau gròp de persona es pas aguir queu gròp». Quo es ben conegut que : los josius an las mans crochudas, un gròs nas e per mielhs se far reperar, perqué son pas francs, portavan a una epoca una estela jauna sus la peitrina.

Nòtas :
1/ Los dets daus gais sus alteròis
2/ Despuei ‘quela legida, ai ‘restat de me tripotat a gaucha, vole esser de dreita, vole esser de dreita 😉
3/ Ai fach de las charchas, lo gatge es pas jamai botar dins la casa « umor ».

perverti.jpg
Publicités