Los galetons

Coma promes, mete aquí la recepta daus galetons. Quo es ‘na recepta dins la familha dempueis 7 generacions. Fau pas l’imprimar dins l’eidèia de la perdre o de pas la realisar un jorn, autrament las chausas las piegeras van vos tombar dessus :

vòstre peisson roge vai virar claustrofòbe, vos dròlles riscan de votar Sarkozy dins 3 ans, un auseu porriá mingar vòstre chin…

Per la recepta, vos fau :

  • 500 g de farina de blat negre
  • 300 g de farina de froment (la blancha pòt estre usada sans problèma)
  • 40 g de levadura dau bolengier (subretot pas de la chimica)
  • 2 culhèras a sopa d’òli
  • 1½ l d’aiga
  • ‘na pincada de sau

accessòris : un fuòc de buesc, una galetiera, dau temps, una granda au canton…

Boirar las doas farinas dins ‘na granda topina (emb los bòrds nauts), versar l’òli, la sau, la levura (aigada a part dins un veirre), puei l’aiga teda. Fau pastonar un brave moment puei laissar la pasta levar (de 2 òras d’aicí a la jornada).

Una vetz la pasta levada, dins ‘na padela o una crespiera chauda, fau botar un pau d’òli, de la pasta, far cueire benleu 30 secondas un costat, 30 l’autre. ‘Tencion, quò sembla ‘na crespa mas quò es mai espés, per la tornar, fau usar d’un culher ne’n buesc.

Be, minjar los, natura, emb dau fromatge blanc, dau sucre…
Bon apetit.

galeton.jpg
La prumiera fòto banturla de l’annada
Publicités