20 de genier, St Sebastian !

‘Tencion las conjugasons e mants mots son pas de la prumiera regularitat :p

Sem la Sent Sebastian, lo patron daus gais mai daus pestiferats. Vau pas far una tèsa sus lu personatge, mas contar un bocin de « la legenda dorada » dau Jacques de Voragine (1).

Sebastian, originari de Narbona e ciutadan de Milan, era animat d’una fe crestiana arderosa. Ben aimat per los dos emperors pacans Maximien e Dioclétien, era regent de la prumiera tropelada e l’avian estachat a lur persona.
Una vetz, dos bessons aneten estre decapitats per ne pas voler abjurar lur fe. La mair ven per purar, lu pair, lurs femnas emb lurs nanets maitot ; e nos dos bessons eren pas fièrs. Lu futur St Sebastian ‘riba per calma tota quela gent :

-Vos, braves sodards dau Crist, que tot queu marmudís vos fajatz pas dire non a la corona esternela !

-Vos, pairs, siatz sens una crenta ! Van pas esser separats de vos, van vos preparar ‘na meijon durabla dins los ciaus.

Dau temps que Sebastien parlava coma quò, ‘na granda lutz tombet dau ceu acompagnat d’un manteu lusent e de sèt angeus que arluciavan.

Un autre jorn, batejet un tipe e queu-quí gariguet d’abòrd. Queu tipe zo diguet au prefèct de Roma. Lu prefèct, malauta faguet venir Sebastian. Aquí, nòstre òme se la juguet coma Gesus dins lu temple e besilhet mai d’un cent d’idòlas, ‘na pita morala sus tot quò e lu prefèct tornet se quilhar d’en-pè.

Granda batejada ! Lu prefèct e 4000 personas.

Quò era pas per plar aus dos emperors. Realiseten un prumier martir sus un amic dau Sebastien. Seança de marcha sus daus tisons e per ‘nar mai vita, tranchatge de testa (2).
Aprep lu quite Sebastian fuguet martirisat. Dioclétien lu faguet estachar aprep un pau e ordonet aus autres sodards de lu traucar de flecha. Los sodards l’an cubert de sagetas coma un eiriçon. Lu Sebastien moriguet pas, fuguet sonhat per Irèna e tornet se montrar aus emperors.

St Sébastien soigné par Irène – Orléans (Atelier de Georges de La Tour XVII e)

Los dos emperors lu fagueten foetar e gietar dins los esgots per que los crestians veneressen pas la soá relica.
Mas a negra nuech, veiquí tornat lu Sebastian jos la fòrma d’una vision aprep la senta Lucina. Li balhet l’endrech ente se trobava son còrs e li damandet de l’ensebelir pres daus autres martirs.

Lu patronatge de sent Sebastian debutet quante un angeu eisplica a la gent de Pavie que per botar defòra la peste, lur fau bastir un autar consacrat a sent Sebastian. La peste ‘restet còp-sec, las relicas dau Sebastian fugueten portadas a Roma.

Fin finala de la partida conhacopedià d’aqueu bilhet, St Sebastian es lu patron daus pestiferats.

o(-!-)o

Mas, adonc tati tonton Jipe :

« Coma lu sent Sebastian es arribat icòna protectriz chas los gais ?»

« Fau vertadierament tot vos dire ».

Dins la ‘gleisa catolica, i a pas tant de sèxe que quò contrairament aus dius daus Grecs, quo es lu perqué dins la bible son totjor de minjar. Mas tres figuras podan esser representadas qua’iment nudas : lo Crist, Sta Magdalena e St Sebastian.

Fau pas imaginar de la gent se tripotar davant lo Crist. Mas, eiritada de la pintura Bisantina, dès lu Xe s.

[…] una convencion iconografica es usada per simbolisar lu caractèr uman dau Crist. Jos lu perizonium es constituat un ipògrame (o un ipòmorfe) que eschapa a la representacion mas s’evoca dins-e-per ela (3) […]

sexe_crist.jpg
crist.JPG
Esmalh lemosin (XIIIe s.)
Benleu dau tresaur de Grandmont (‘chaptat per los amics dau Louvre)(4).

Sta Magdalena pòt esser representada maitat nuda, o b’etot, peitrina decuberta. Adonc, los evesques eteròs an mai d’una vetz ‘chaptats una representacion de la senta. Faliá ben passar las nuechs.

mad.jpg
Marie Madeleine de Giampietrino (Giovan Pietro Rizzoli) XVe s.

Avetz devinats lu ròtle dau Sent Sebastian, mas ‘questa vetz per los evesques gais. Ai botat la lengenda dorada perqué de la legir, vesem ben que lu goiat deu aver ‘na granda trentena d’annada, benleu quaranta. Las prumieras representacion (Ve s) balhan de veire un tipe barbut, madur mesma. Lu tipe es capitani. E puei, a la debuta dau XIVe s. veiquí nòstre St Sebastian un pauc pus jòune, d’annadas ne’n annadas, de representacions en representacions (4).

I a pas besonh d’espsicanalisar (5) aquela mutation dins l’imatge dau Sebastian, emai Mishimà prenha queu risc dins « Confession d’una masca » ; davant un St Sebastien dau Guidò reni :

« Las impulsions tant invertidas coma sadicas son mai que liadas. I a pas mestier de cròsar lai-luenh per revirar lu plaser de l’efeba aus flechas (o a las ‘gulhas dau masles archiers) coma ‘na somession eròtica ».

reni_louvre.jpg
Un daus St Sebastian dau Guidò Reni
XVIIe s.  Benleu pas lo mai brave mas se troba au Louvre.

Nòtas:
1/ Nascut ~1230 a Varaggiò, près de Gèna (lo nom francés « Varagine » o « Voragine »). Entra coma dominican ne’n 1244, fach la colecta de las legendas sus los sents e las sentas, rediga lo libre en latin. Es mòrt ne’n 1298
2/ desjà lo culte de la vitessa.
3/ lu perizonium (dau latin perizoma o panhe de la descença), la pailha per cachar lo birron. Tèxte tirat de : Alexandre Leupin « Phallophanies – La chair et le sacré » Editions du regard.
4/ liam vers l’esmalh lemosin e ‘n’autre liam vers la SA dau Lemosin
5/ picatz queu sit per veire de las representacions iconograficas dau St Sebastian
6/ Lu memòria de maitrisa en istòria de l’art dau Karim Ressouni-Demigneux « Le regard homosexuel sur Saint Sébastien tel qu’il etait representé en Italie autour de 1500« , es dau bon legir, l’avetz formatat *.html o b’etot *.pdf
Autres libres :
Jasques d’Arriulat « Sebastien, le Renaissant »
Francesco Valcanover « The Treasures of the Accademia Picture gallery in Venice »
Yukio Mishima 三島由紀夫 « Confession d’un masque« .

Publicités

2 réflexions sur “20 de genier, St Sebastian !

  1. Adiu,
    Queu sit es plan ben realisat mas ancian e pense pas que la gent (daus volontaris) volon le tornar « modernisar ».
    Te fau charchar emb l’aida de ton butinor « Karim Ressouni-Demigneux ». Quò deu se trobar vers la fin de la pagina liada.
    Autrament lo sit es clafit de documents.
    Bona jornada

    J'aime

  2. Bòte pro de comentaris, mas ton liam vers lo memòri sobre las representacions de Sant Sebastian mena tan de memòris, d’articles, e… T’aremercie.

    J'aime

Les commentaires sont fermés.