Mià e lo Migo

migo.jpg

Bon, dins la familha « la televicon es un mòble e lo cinemà un art », vodriai los films per los pitits goiats. Deve esser franc, n’aime pas veire lo film d’orror. Ai esperat mos 30 ans per ‘nar veire lo meu prumier dins un cinemà, e enquera eriá pas tot sol.
Adonc de veire ‘quela aficha emb la goiata dins la man dau monstre, ai ‘gut un pauc paur. Puei, ai visat l’ora de passatge, lo film es balhat a 15:00, 17:00 e 19:00. I vau per los 15:00, coma quò sei segur que la pita sufrirá pas de tròp per poder tornar jugar d’aici a 19:00.

Vòle ben torturar ‘na goiata mas pas i far far tròp de trabalh, dautant mai que las vacanças son pas ‘chabadas. »Mià e lu Migo » conta l’istòria d’una pita filha que visa son pair s’accidentar. Decide adonc d’anar lu sauvar. Sur lo chamin, trobará de las pitas vielhas totas enchapeutadas ne’n nautor de saviesa, mas la Mià ne’n a que far d’esser ‘na goiata sàvia. Trobará d’autras dròllas, ‘n dròlle, ‘n’autra vielha esdentada e un pauc boruda e lo Migou.

L’autre eròi dau film es un dròlle representant la marrida consciéncia occidentala. Son abséncia de pair es un bastissor, un visionaire, un « winner » segon son dire e se de las vetz, lo goiat poviá esser vendut, ben, quò seriá leu fach. La soá mair es absenta maitot, sa granda es partida córrer emb un grand negre.

Coma quo es un film d’animacion, me fau tanben parlar de las votz usadas :

Garance Lagraa per la votz de Mia
Charlie Girerd interprete Aldrin
Laurent Gamelon fai lo pair, Jekhide
Miou-Miou es la mair
Line Wiblé, la granda
Per las vedetas, i a Yolande Moreau per las vielhas e la sorcièra, Coffe, Richard, Derec, Maïté… e lu Migo es Dany Boon.

Veiquí plantat la decoracion per una brava istòria, ben genta. Segur, un conte aisat de compréner per los pitits. Coratgós per esplicar coma lo chamin de la vita fai frotjar las personas, ben pro aisat per far prendre consciéncia daus problemas de la terra, subretot dins ‘questa periòda de corsa per milionaris quatrequatrisats e que l’accion dau film es ne’n america dau sud. Coma i a pas tant de moneda per la propaganda que per los films americans, degun parla d’aqueu film. Quò es fach. Film europèu de bon veire, realisat dins lo mesma esperit que los films dau Miyazaki : Princessa Mononoke, lo viatge de Chihiro.

Mià e lo Migo, un film dau Jacques-Remy GIRERD
Sus lo sit « Mia & le Migou« , lo sit « folimage » o lo sit « art & essai« .

Publicités