Ikea ((c) encerclat) occitan

Quauqu’un a damandat dins ‘n’amassada çò que restará de 2008. Adonc beucop de gent an parlats de las chausas auvidas dins lo pòsta dempuei ‘na setmana. Deve èsser franc, la question era generala, mas de totjorn tot reportar a mon perron, ai parlat de mon pitit nebot.

Queu estiu, am farjat, mon pair, mon nebot e me, daus molins. Quo es colhon, io sabe, mas ne’n aviá mon confle d’entendre mos parents parlar d’un temps qu’esista pus ; la discuta portava sus los joècs d’autravetz.

Dins lo temps i aviá pas tot quilhs bidules a pilas… per Nadau n’autres aviá ‘n’iranga e quò era ben pro… ‘n’annada, quò son mos frairs qu’en far lo breç per ma catí… me quante gardava las vachas, fasiá daus molins sus lo pitit riu…

An pas entierament tòrd, segur, mas entre tròp e ren, i a de la plaça, e coma aime ben los far chiar, ai dich qu’en luòc de parlar, feriam mai de far. E nos veiquí de charchar de las pitas pòsts (daus bastonnets de glaça feran ben), dau fiu, quauques calaus (pas las bilhas, las notz), ‘na puncha.

Per lo molin d’aiga, vos fau :

  • doas pòsts
  • un baston de nosilhiera
  • dau fiu o de las malhadas de jonc
  • dos baston ne’n « Y »
  • ‘na rigòla o un riu
  • opcion : daus calhaus, de la terra glaisa, dau ciment, ‘na centrala idroelectrica, un engenhor daus travaus ‘chabats jos la fòrma de la granda…
post.jpg

Dins un prumier temps, fau entalhar (1) dins lo mitan las doas pòsts per las ‘semblar coma sus lo dessenh (2). Lo baston de nosilhera ferá l’aubre (3). Lo tot es ‘tachat per la ficela, puei posat sus los bastons en « Y ». Podetz far un barradís emb daus calhaus e posar lo molin au mitan dau saut d’aiga.

molin.jpg

Bon, jusca a aquí ren de nuòu per beucòp d’entre vos, mas per mon nebot. La jòia de veire un chause de ren anar emb l’aiga, un chause fabricat per lo grand-pair « coma quante eu era pitit », ‘quela jòia era plan brava de veire. Bon ‘n’ora aprep, era tornat jugar emb los bidules a pilas, mas tot en parlant dau molin.
Los autres jorns am deguts fargar la varianta balhada per la mameta-engenhosa dins lo bastiment :

Quante eran a Grenor-l’aiga (veire nòta), mos frairs fasián pas coma quò-quí. Fasián…

Los oncles fasián emb de las nosilheras talhadas a la forcha e ilhs torcián las branchas bòrd contra bòrd.

grenord.jpg
~~oOo~~


Autre jorn de miràudia per lo nebot, la fabricacion dau molin-notz, vite renomat « elicoptere ».
Per lo molin varianta notz, vos fau :

  • doas pitas pòsts (‘quí daus bastonets de glaça)
  • una notz esvidada
  • un bocin de fiu
  • un claveu de buesc (quò es mai aisat per atalar lo fiu que lo fer)
  • de la còla

notz.jpg

Fau minjar la notz dins un prumier temps, aprep fau netiar las còcas e las traucar totas doas en dessur.

Fau tenir la notz « coma se ela era barada » per traucar un autre cròs sus lo costat (dins queu cròc, i auràs de passar lo fiu).


Bon, aura dins l’ordre, fau passar lo cláu dins las doas pòsts amassadas, engulhar lo cròs dau naut d’una còca e atalar lo fiu dins la fendilha. Vos fau barrar la notz emb lo darrier bocin embavat (encòlat).

I a pus que tornar las palas per entortilhar lo fiu una prumiera vetz, puei, tirar dessus lo fiu, laschar, tirar, laschar, tirar, laschar…

notz2.jpg

‘Tencion, queu juec fai pas marchar l’economia dau país, es realisat sens pinturas nocivas, pòt èsser realisat per los grands coma per los goiats e las goiatas maitot. Se v’autres avetz pas enquera gietat la televicon, esperatz la propaganda de las saussissas plasticas, Geò ((c) encerclat), per debutar lo bricolatge.

Nòta : Grenor l’aiga, Grenord en francés. Grenor l’aiga, Charanta Lemosina, a vist lo batisme de Sadi Carnot.

Los dessenhs son mos prumiers realisats emb Inkscape, i tornarai.

Publicités