La tortiera

Veiquí un vertadier plat ivernau. Me sovena d’aquelas de ma granda, cuechas dins la chemenèia tota ‘na mandinada, tortiera-pompira-codena (dins ‘n’autra vita, ai minjat daus animaus), tortiera pomaterra-inhon, poma-salat, de las vetz quò eria clafit emb de las chastanhas…
Auèi, veiquí ‘na tortiera, per 6 personas, adaptada per los vilauds vegetarians-jan-maniaca-marcha-se-quò-n’aviá-ren-minjat-de-15-jorns-quò-lu-mijariá-ben.

Per la pasta, vos fau :

  • 500 gramas de farina (blat negre quo es melhor mas la blancha pòt o far)
  • 1 veire d’aiga
  • 1 cuba (40 g) de levura dau bolengier (o de la chimica, mas quò marcha pas parier per levar)
  • 1 uòu de pola
  • ‘na pincada de sau

Dins ‘na granda topina, boiratz la farina, la sau, la levura, pueis l’uòu e lo veire d’aiga. Boiratz, sens tassar, jusca a aver ‘na pasta coma sus la fotò (espassa mas destachada daus bòrds de la topina). Laissatz possar ‘n’ora dins un endrech chaufat.

Aprep, vos fau tornar un pauc pastonar sens petonar, n’es-quò pas ? Pueis fau far ‘na bola (veire fotò) e la laissar posar ‘n’ora de mai dins un topin e dins un endrech chaufat. Quò balha le temps de preparar la ganitura que ven.

Per la garnitura, vos fau :

  • de las pompiras (4 gròssas)
  • ‘na ‘lissa
  • de las algas
  • dau pebre

Pòdetz o far emb de las pompiras, dau salat, 1 inhon, de la sau, dau pebre, dau perresilh (o de las chausas que v’autres aimatz coma de la citrolha…).

Bon, atz preparat quauquaren per la garnitura, l’ora es ‘chabada, quò es temps de burrar un plat emb lo fond desboitable ; segur qu’auèi una tortiera de terra quò cor pas las ruas.


La
bola de pasta deu èsser copada : 2/3 per lo fond, 1/3 per lo chapeu. Fau estalar la pasta emb lo roleu, la posar dins lo plat e per dessus, botar la garnitura e ‘chabar per lo chapeu.

Bon, ben resta d’enfornar nòstra tortiera enchapeudada per ‘n’ora termostat 6 / 180°.

Variacions :
– Coma la pasta deu èsser levada, pòdetz la preparar la jornada d’avant.
– Per economisar lo forn, pòdetz precuèire 15 minutas, las pomas e las algas dins lo cuech-vapor (e dins queu cas, far cueire 35 minutas dins lo forn).
– Pòdetz clafir emb de las fruchas : compota, pruneus (emb de la crema : un uòu, una culhera de farina, una culhera de sucre, un veire de lach, lo tot boirat), de las pomas o de las perras…

 & 

___

Auvir la recepta sur Radiò PAC (vers la minuta 25) per deschargar, bouton de drecha e enregistrar jos

27/02/2008

3 commentaires

  1. jp que lo frair es vertadierament cosinier mas pas se dit :

    Segur que la tortiera es un plat pas char, bon e vitament fach per un endeman de festa, coma la dau solstici d’ivern o de la Sta Lutz (lo 13) per festejar lo retor dau solelh. (torne ‘pelar ‘quí que los catolistes an inventats lo 25 (coma lo reste) per anar contra las festas popularas dau solstici (festa celta e romana, festa de l’aubre verd, festa dau solelh que va tornar frutjar). Dins la bible (Matthieu 1·6), lo Jesus es nascut quante los josieus devian se far recensar, quò a la data de la pascas josieuva. Lo jorn dau 25 de decembre ven au IV sègle).
    Me sei permis de las libertats coma las algas, quò fai pas tròp lemosin (am pas la mar, maugrat lo rechaufament de la terra) e quo es benleu mens populara, mas bon, la gent an ‘quí ‘na basa, an pus que o far coma ilhs voudrán.

  2. Godilhaire dit :

    Magnific ! Mon grand-paire disiá que per la segada li caliá pas de tortièra, dempuèi las tortièras de l’Agenés son devengudas còcas e d’una certana manièra son estadas reviscoladas…
    Mas la VERTADIÈRA tortièra, ‘questa que legissi aquí la recepta, es encara de reviscolar, reviscolar per una usança populara ; me demandi ça que la se la cosina populara, donc occitana, es pas simplament en dangièr, amb aqueste monde de fat que non sábon pus d’ont venon los produïts e quand los cal adobar per ne fargar un bon plat, problèma de transmission que es similar a la transmission lingüistica, un bon minjar, simple, pas car, e sobretot adobat ambe l’environament, lo sòl d’Occitània.

Les commentaires sont fermés.