Lo dinnar per la Sonià

Dissabde,pict0078.jpg mon anciana veisina èra tornada per passar una partida de la longa dimenjada dins sa familha. De la mesma vetz qu’èra un biais per ela de far lo torn daus amics. M’aviá conhat dins la trencha dau dinnar.

Des lo mandin, ai preparat un pan, l’ai fach cueire a miedjorn. Ai ‘chaptat au merchat dos pissanlieits e daus granons (1), dau miau, de l’alh, de las pomas (la frucha), dau cabecon. Me vaiquí pres per far a minjar per ma Sonià.

Los granons son mes dins lo cuech-vapor, los pissalaits (durs amb lo boton de la flor, quò es ben tòst la fin) son metuts dins un topin amb una pinçada de sau e dau jus de citron.
De queu temps ai preparat una pasta brisada, ai copat las pomas, un peron, botat en dessur l’aparelh (calhet de sojà (2), uòus, farina) e vaiquí una tarta.
Aprep quò ai preparat las tartinas : una brava trancha de mon pan, de l’òli, dos pruneus, un albricòt. ‘Quí, dau miau alhat, de la frigola, de l’espeluchas de cabecon e per ‘chabat un pauc de parmesan. 15 minutas au forn (th 4/5).
Lo cuech-vapor tuat, ai surtit los granos, los ai posats dins una ‘sieta per qu’ilhs fregiscan un pauc.
pict0075.jpg

Quò es 20h00 quante Sonià ‘ribèt. Ai ‘gut lo temps de ‘chabar las doas ‘sietas composadas per auvir un :

« Mon Jipi tu es lo rei de las pitas composicions fachas amb tres bocins de ren e quò sent bon. »

:-))

Avèm pas beguts de vin perqué seguís un regim (arrest dau tabac e èsser comediana fan pas bon menatge per lu vestit). Sonià m’a mesma fach legir un pitit tèxte ne’n occitan (Jan Ganhaire dins las novèlas de l’estranh) per me balhar daus conselhs : respirar, bufar, articular, descopar…

Sabètz, nos avèm obludats las misèrias dau monde per profitar dau moment present !

notas :
1- Per la gent de la campanha quò es de las testas de chaul copadas just’avant la florason (ma granda e ma mair fasián quò amb de las testas de chaul « campalié » (lo chaul per lo conilh e la lapina)).
2- lo calhadis es realisat amb dau lach de sojà e un pauc de quefir (kefir en francés). Vau botar la preparacion mas un autre jorn.

Publicités

3 réflexions sur “Lo dinnar per la Sonià

  1. jp 26/03/2008 / 20:25

    Mercé per los comentaris, espere qu’ilhs son non pas per la peitrina de la pita goiata mas ben per lo brave dinnar 😉
    @Joan : voldriái ben m’enregistrar mas mon micro es una misèria ne’n mai d’aquò l’enregistrament me balha una votz davant la muda, ja qu’ela se troba mau placada…

    J'aime

  2. JF Blanc 26/03/2008 / 15:45

    Es pas fairplay de botar d’imatges tan sabroses que s’i pot quitament pas tastar ;-(

    J'aime

  3. Joan.Peiroton 25/03/2008 / 14:47

    I a de còps, aital, que regreti de pas èsser a Orleans, la vila del paire !!! Aquò és un post plan savorós, amb de monde plan simpatic! E lo texton en occitan, lo nos faràs ausir sus ton oèb un jorn???? Bona setmana!!!

    J'aime

Les commentaires sont fermés.